понедельник, 25 ноября 2013 г.

АЙТСАМ ТИЛИМ, АЙТМАСАМ ДИЛИМ

Гапни нимадан бошлашга ҳам иккиланиб қолдим. Хуллас, қадрдон блогим, сенга таълим тизими ҳақида дард-хасратларимни дастурхон қилмасам, портлаб кетаман.

Вилоятдаги таълим тизимига билвосита гувоҳ бўлганим учун ҳам, талабаларни дарсларга қатнашмай, ишлаб юришларини кўриб, “борсак ҳам, бормасак ҳам барибир ёппасига беришимизга тўғри келади, “4”лик фалон сўм, “5”лик писмадон сўм” ва шу қабилдаги гапларни талабаларнинг ўз оғзиларидан эшитганим учун ҳам доим пойтахтда таълим олишга интилганман.

Лицейни тамомлаб, бир йил ўқишга киролмадим. Ҳозир Ўзбекистон Миллий университетининг Журналистика факультетида таҳсил олиш бахтига муяссар бўлганимга ҳам 3 йил бўлибди. Оллоҳга шукр. Шу 3 йил мобайнида қинғирликларга деярли гувоҳ бўлмадим. Илм олиш пайида бўлган талабаларга барча имкониятлар мужассам.Аммо:

Иккинчи даражали фанларга йўналиш фанлардан кўра кўпроқ диққат қаратилиши бироз тушунарсиз. Биринчи курсда илк семестр мобайнида икки пара қўйилган “Олий математика” кейинги йил биринчи курс талабалари учун иккинчи семестрга ҳам узайтирилди. Фан мутахассиси фанини қанчалик яхши ўтмасин, Олий математикани жуда оз сонли журналист талабалар яхши тушунади, асосан, пойдевори бўлган 10 фоиз талабалар ўзлаштиради. Қолган 90 фоиз талаба давомат учун ўтириб беради холос. Мутахассислиги бўлмаган фанларни чуқурлаштириб юбориш, талабаларнинг миясини “ачитиш”дан бошқа нарса эмас.

Бу борада мурожаат қилинганда, “Бу Олий ва ўрта махсус таълим вазирлиги томонидан ўрнатилган жадвал, биз ўзгартира олмаймиз” – деган жавоб олинган.

Энг қизиғи: иккинчи курс бошида жадвалда география фанини кўриб, ҳайрон қолдик: “Устоз, географияни биринчи курсда ўтган эдик-ку, бу бир семестрлик фан эмасмиди?” - деганимизда, устознинг “Тўғри, бир семестрлик фан. Аммо ўтган йили жадвалга адашиб қўйиб юборилган экан, аслида энди ўтилиши керак экан” -  деган жавобидан яна-да ҳайрон қолганмиз. Шундай   қилиб,   биринчи  курсда  жадвалда  адашиб  қолган  географияни кейинги  йили  икки  парадан қилиб ўтдик. Иш жараёнида қайсидир фаннинг бир
семестрлик таълими  ва ойлик маошининг хатолик туфайли бошқа бир ўқитувчига ўтиб кетиши, сарфланган вақт учун ким жавобгар?

Ундан ҳам қизиғи: мана шу йил жадвалга бизнинг наздимизда бир хил бўлиб қолган
(аслида эса иккита умуман бошқа-бошқа) фанлар - “Социология” ва “ОАВ социологияси” – қўйилгани бўлди. “Социология”дан эшитган гапларимизни кейинги пара “ОАВ социологияси”дан ҳам эшитамиз ёки шуни ҳам эшитмаймиз. "ОАВ социологияси" фанидан мутахассиснинг йўқлиги ва фан доирасида адабиётларнинг етишмаслиги, борларининг жахон стандартларига жавоб бермаслигини кўриш мумкин. Ўтилаётган маданиятшунослик фанининг мавзулари ҳам ўтган йилги "маънавият асослари”нинг мавзуларидан фарқ қилмайди. Ўша-ўша гаплар.

Тўғри, журналистлар ҳамма соҳалардан хабардор бўлиши лозим. Кўп фанларни ўзлаштириш билим доирасининг кенгайишига хизмат қилади. Аммо биринчи навбатда ўз соҳасини чуқурроқ ўрганиши керак эмасми?!

Йўналиш фанлар учун ҳафтасига бир пара ажратилиб ёки уларнинг баъзи ўқитувчилар томонидан бўш тартибда ўтилиши ҳолатида, баъзи иккинчи даражали фанларнинг эса ҳафтасига икки пара қўйилиши ёки қаттиқ тартибда ўтилишини ёки юқорида келтирганим кулгили–ачинарли ҳолатларни қандай тушуниш мумкин?!

Дарс жадвалларини белгилайдиган Таълим вазирлиги бу борада яна-да чуқурроқ ўйлаб
кўрса, мақсадга мувофиқ бўлармиди. Ахир, йўналиш фанларни бўғиб туриб, қандай қилиб
етук кадрлар етиштириш мумкин?! Таълим соҳасидаги муҳим билан ўта муҳимни фарқлай олмаслик яхши оқибатларга олиб келмаслиги аниқ.


воскресенье, 6 октября 2013 г.

KAMALAKKINAM


Kamalakni yaxshi ko’raman.Uning rang-barangligi hayotimga o’zgacha mazmun kasb etgan doim. Mening kuchim. Ilhom manbaim. Sevgim mujassam hilqat. Hayotdagi qora ranglardan holi, beg’uborim. Naqadar beg’uborlik… Ishongim kelmaydi. Shunaqasi ham bo’lar ekan-da?! Huddiki, botqoqlikda o’sadigan nilufar kabi. Ba’zi nihollar-u  gullarga qancha yaxshi sharoit yaratib bersang-da unib keta olmagan sharoitda, Kamalak shunday kuchli e’tiqodga egaki, chirkin muhitda ham asl o’zligini saqlagan holda namoyon bo’la oladi.

Shunchalar jozibadorki, qani endi tuta olsam, doim yonimda bo’lsa, istagan paytimda ko’ra olsam, to’ya olsam… Shu kabi xom-xayollarga berilib ketib, uning g’oyib bo’lganini sezmay qoladi kishi. Hafsalang pir bo’lib intilganim shu edimi deysan-u, o’sha xom-xayollar qalbingning tubiga cho’kadi.Va bu cho’kindi vaqti-vaqti bilan loyqalanib, hayotni xira pardaga o’rab oladi.

Ammo Kamalak ham uni doim aro yo’lda qoldirib ketadigan shu yomg’ir bilan, shu quyosh bilan kamalak. Garchi bevafo bo’lsa-da, ularsiz kamalak ham mavjud emas. Insonlarda ham shunday: “Odam odam bilan tirik” bo’lib, “Kuch birlikda”. Suv yuzasida qalqib turgan moy tomchisini ham o’sha ”jamiyat”dan yaxlitligicha ajratib bo’lmaydi. Suv bilan qo’shilib keta olmasa ham, u shu muhit a’zosi. Etni tirnoqdan ajratib bo’lmagani kabi hammasi bir-biriga chambarchas bog’liq.Va tabiatga hammasi birdek muhim: suv ham, moy ham, yomg’irsifat insonlar ham, kamalaklar ham, quyoshlar ham.

Kamalaksiz hayot faqat oq-qora ranglardangina iborat bo’lib qolardi. Tasavvur qilaylik, tabiatning rang-barangligi so’rib olinsa, qanday fojea… Oq-qora televizorni birpas ko’rsak, yuragimiz siqilib ketadiku, butun boshli tabiatni esa tasavvur etishga qo’rqadi kishi. Qalb ham shu kabi: hayotning go’zalligini har bir rangda his etib yashash qaydayu, aksi qayda. Hammasi bizning MUNOSABATimiz mahsuli. Inson o’z munosabatining mevasi. Yaratganning yaratuvchisi.

Yomg’ir yog’yapti... Juda uzoq yog’vordi o’zi ham. Ammo bu uzoq yomg’irdan so’ng yana kamalak chiqishiga ishonaman. Faqat o’shanga qadar Buyuk Yo’l sari shoshayotgan Vaqt aravasining oyoqlari ostida yanchilib ketmasam bo'ldi…

суббота, 27 июля 2013 г.

ЮЗ СУМ УЧУН ТОПТАЛГАН КАДР ЁХУД ЛОКАЙД ЗАМОНА



Бу воқеага анча бўлди. Ўзи ёзмоқчи эмасдим, аммо шунга ўхшаш ҳодисаларга яна ва яна учрайвергач, ёзишга қарор қилдим. Бу транспортда булган вокеа холос, аммо шу каби холатлар жамиятнинг  бошка кисмларида хам талайгина.

Иссиқ кунларнинг бирида юмуш билан кўчага чиқдим. Ишларим тугагач, уйга томон йўл солдим. Автобус Олой бозори бекатида тўхтаганида, йўловчилар билан  чамаси 65 ёшлардан ошган бир кекса аёл икки қўли тўла юк билан чиқиб, қаршимдаги бўш ўриндиққа ўтирди. Сўнг  автобус ҳам қўзғалди, чиптачи ҳам: йўловчилардан пул териб, чипта тарқата бошлади. Мендан кейин навбат ҳалиги бувига келганда, у чиптачига 500 сўм узатди.
- Ещё сто сум, – деди чиптачи аёл (Дарвоқе, ўша кезлари йўл ҳаққи 600 сўм еди).
- Бошқа пулим қолмади, қизим. Бозорликка ишлатиб қўйибман, – хижолатомуз жавоб берди буви.
- А мне что, проезд 600 сум. Дайте ещё сто сум, - оёғини тираб олди чиптачи ҳам.
- Бошқа пулим қолмади, деяпман-ку. Йўқ пулни қаердан оламан, - одамлар олдида баттар хижолат бўла бошлади буви.
- Это мне не интересно. Ну-ка,  дайте сто сум...

Вазиятни бироз кузатиб турдим. Бунга атрофдагиларнинг муносабатини билиш мен учун қизиқ эди-да.

Тортишув тинай демас, аксинча, авж нуқта томон йўрғаларди. Чиптачи ҳам 100 сўмдан воз кеча қолмади. Автобус тўла оломон. Ишонасизми, бирортаси  “миқ” этмади. Бирортадан ўша савил қолгур 100 сўм чиқмади. Кекса инсонга нисбатан раҳм-шафқат, ҳурмат деган тушунчалар ёт эди транспорт  ичидаги жамиятга.

Ортиқ чидаб тура олмадим, қўлларим чиптачига 100 сўм узатиб юборди. Пулни олгач, овози ўчган чиптачи  узоқлади. Бироқ... Шунча хўрланган буви хўрланишини томошабин бўлиб кузатаётганларга бир қараб, қўлини очиб мени дуо қила кетди:
- Барака топинг, қизим. Илоҳим бахтли бўлинг. Раҳмат, раҳмат...

Шунчалик самимийлик билан қилаётган дуолари, сўзлари виждонимга туз бўлиб сепиларди. Аммо сўзларига қўшилганим ифодаси ўлароқ жилмайиб қўйишга мажбурладим ўзимни.
Бувининг кўзларида ёш қалқиди. Гадога берсангиз ҳам олмайдиган арзимас 100 сўм,айни вазиятда, бир инсон учун катта ёрдам, муаммонинг ечими бўлиб турганди.

Нега атрофимиздагилар ҳаётига бунчалар лоқайдмиз? Нега тепса ҳам тебранмаймиз? Бўлар-бўлмас нарсаларга, кўнгилхушликларга пулни аямай совурамиз-у, нега энг зарур вақтда – инсон қадр-қиммати қадалган нуқтада – чўнтагимиздан сариқ чақа ҳам топилмайқолади? Ахир, 100 сўм нима деган гап? Наҳот, шу чақа инсон қадр-қимматидан устун кела олди... Мен-чи, мен. Нега оломон билан бирга томошабин бўлиб, воқеани “газак” олдирдим?

Балки гап пулда ҳам эмасдир? Инсонларнинг  бир-бирига, воқеаларга нисбатан тобора лоқайд бўлиб бориш илдизини ишончнинг йўқлигига  тақаган бўлардим. Ишончсизлик нимадан келиб чиқади?  Жамиятда фирибгарларнинг  мавжудлигидан. Тасаввур қилинг,  кўчада  кетяпсиз. Бир кекса киши, икки қўлида юк, сиздан манзилга етиб олгунига қадар ёрдам сўради. Лекин у ҳақиқатда ёрдамга муҳтож қариями ёки ёрдамга муҳтож қария ниқоби остидаги ғараз ниятли инсонми, кейин сиз кўтаришга рози бўлган юклар қандай юклар? ичида нима бор? Худо билади. Бировга яхшилик қиламан, кўмак бераман, деб ўзи билмаган ҳолда кимнингдир қабиҳ ниятларини амалга оширишида туртки бўлган, тухматга қолиб суд олдида жавоб беришгача борган одамлар ҳақидаги гаплар тез-тез қулоққа чалиниб турадиган замонда лоқайд оломонни айблаш балки унчалик ҳам тўғри эмасдир...

Балки чиптачи шу 100 сўмдан кеча қолганида... Аммо чиптачилар ҳам эркин шахслар эмаслигини,  давлатга  тўлов тўлаши, ҳисоб бериши лозимлигини унутмаслик керак. Қолаверса,  улар иш тажрибаси давомида “пулим йўқ” – деган нечта бир фирибгарларни кўравериб, кўзлари қотиб кетган. Бу ерда ҳам гапнинг бир учи бориб ишончнинг тугаб-битганига  тақалади.


Хўш, унда нима қилиш, қандай йўл тутиш даркор? Фирибгарларнинг касрига ҳақиқатда ёрдамга мухтож мўмин инсонлар қолиб юраверадими шунақа? Балки инсонларни фарқлай олиш учун эндиликда психология фанини ўрганишни кучайтирармиз? Лоқайдлик афзалми ёки  таваккалчилик?

Хулоса ҳар бир инсоннинг виждон ҳамда ақл ҳамкорлигидаги қарорига ҳавола. Шу ўринда биз ёхуд опамиз, синглимиз, онамиз бўлиши ҳам мумкин эди-ку. Айтиб бўладими, ахир, буни ҳаёт дебдилар...

Ўртоқ  ўқувчи! Мабодо, шуни ҳам ёздингми, майда-чуйда гаплар демоқчи бўлсангиз,  тўфонларга-да сабаб бўлувчи улкан денгизлар  томчидан бошланганидек, йирик муаммолар ҳам дастлаб майда бўлмайдими?

Бекатга етиб келганимни пайқамабман. Диққатимни жамлаб, очилган автобус эшиги томон юра бошлаганимда, кимдир  қўлимдан ушлаб қолди. Ўгирилиб қарасам, ҳалиги буви. Кўзларимга тикилиб туриб, сўнгги марта миннаддорчилик билдирди.

Уй томон қадам ташларканман, қачонлардир ўқиган сўзларим ("Куръон"да келтирилган) қулоқларим остида жаранглади:

“Эй, бандам, мен сени севаман. Менинг меҳрим билан сен ҳам севгувчи бўл!”

Гулрухсор ХУДОЙБЕРДИЕВА

четверг, 18 июля 2013 г.

“ТОШ”СИЗ БАҚА

Туғилибон  очиб  кўзини,
Тошкосада  кўрди  ўзини.
“Бу  не  кулфат, бу  не бахтсизлик,
Наҳот, дунё тўла  ҳақсизлик?”

Косаси  билан йилдан йилга,
Ўсар  унинг қайғуси бирга.
Орзулари дилида қистар:
“Юк”дан фориғ бўлмоқни истар.

Парвозни  у  хоҳларди яна,
Мақсадига етди-ку ана:
“Ошиқ” бўлди унга сор бургут,
Тошбақахўр ёр-беор бургут.
Кўтарибон осмон-фалакка,
Ва етказди азал тилакка.

Бургут учун орзулари бир чақа
Бахтдан масрур, кар, кўр,  бечора бақа,
Қайдан билсин ерга қулаётганин,
Ажалга рўбарў келаётганин?!

Ниятларин рўёби-ла тошбақа
Бой берди косасин,
Энди у  “тош”сиз бақа.
На бақа ва на тошбақа.

Ва оқибат сор бургутга ем,
Борлиқ соқов,  тили кесик,  жим.

Инсон  ҳам  шунақа,  жасади  жарда,
Ўзлигидан  кечса  агарда.
Ҳеч ким эмасдир у, ҳеч замон,  ҳеч  он,
На одам эрур ва на ҳайвон.
Орзуларни тўғри танлаш ҳам санъат,
Хом  хаёллик  бошга келтирар кулфат.

18.07.2013

понедельник, 20 мая 2013 г.

КУРАШ– МЕЗБОНЛАР ВА МЕҲМОНЛАР НИГОҲИДА

Алимардон полвон Валиев ва Қўлдош полвон Худойқулов

Президент соврини учун Ҳаким ат-Термизий хотирасига бағишланган халқаро турнир юқори савияда ўтди. Анъанага кўра, мазкур турнир кураш бўйича фаҳрий мураббий Алимардон полвон Валиев, фаҳрийлар ўртасида жаҳон чемпиони Қўлдош полвон Худойқуловлар ҳамда кураш мактабида таълим олаётган бўлажак полвонларнинг кўргазмали чиқиши билан бошланди. Беллашув дуранг натижа билан якунланди. Мусобақани бошлаб берган фаҳрий ва ёш полвонлар Сурхондарё вилоят ҳокими Нормўмин Чориев томонидан тақдирланди. Фурсатдан фойдаланиб, Қўлдош полвон Худойқуловни суҳбатга тортдик:

- Билишимизча, фахрийлар ўртасида жаҳон чемпиони экансиз. Курашда эришган ютуқларингиз билан ўртоқлашсангиз?
- Ўтган йилларда бир қатор мусобақаларда иштирок этдим. 2003 йил Тошкентда бўлиб ўтган Жаҳон чемпионатида ғолиб бўлдим. 2005 йил Термизда бўлиб ўтган мусобақада 3 ўринни эгалладим.

- Курашга меҳр қўйишингизга ким сабаб бўлган?
- Кураш билан 1955 йилдан шуғулланаман. Кураш тушиш авлоддан авлодга мерос бўлиб келаётир. Спортнинг бу турини танлашимда отамнинг хизматлари катта. У киши ўз даврининг машҳур полвонларидан бири эди. Тўй ва сайлларда қизиқарли кураш намойиш этиб, биз ёшларнинг ҳавасини ўйғотарди.

- Сизнингча, полвонларда қанақа яхши хислатлар мужассам бўлиши керак?
- Полвонлар иноснийлик, мардлик, жасурлик, ҳалоллик каби юксак фазилатларга эга бўлади. Полвоннинг хислатлари халқимиз қалбида минг йиллардан буён чечак очиб келаётган “Алпомиш” достонида жуда яхши тасвирлаб берилган.

- Кураш келажагини қандай тасаввур эта оласиз?
- Мустақиллигимизга 22 йил тўлган бўлса, шу давр мобайнида юртбошимиз ташаббуси билан ўзбек кураши дунёга танилди. Келажакдаги натижалар янада юксак бўлишига, Олимпия ўйинларига киришига ишончим катта.

Суҳбатни фахрий мураббий Алимардон полвон Валиев билан давом этдирди:

- Айни пайтда спортни, хусусан, курашни ривиожланатириш бўйича юртимизда олиб борилаётган ишлар ҳақидаги фикрларингиз билан ўртоқлашсангиз?
- Болалик давримизда спортни оммавийлаштиришга бундай эътибор қаратилмаган. Ўтган йилларда жаҳоннинг қатор давлатларида ўтказилган спорт мусобақаларида қатнашдим. Элим обрўси учун гиламга тушиб, совринли ўринларни қўлга киритдим. Президентимиз ёшларга, жумладан, ёш полвонларга катта ишонч билдириб, миллий курашимизни янада юксалтириш юзасидан алоҳида ғамхўрлик кўрсатаётир. Энг олис ва чекка қишлоқларда ҳам замонавий усулда жиҳозланган болалар спорти иншоотлари барпо этилиб, барча шарт-шароит яратилмоқда. Бу борада амалга оширилаётган ишлар биз кекса авлод вакиллари зиммасига ёш полвонларни миллий қадриятларимизга хос тарбиялаб, уларнинг маҳоратини янада оширишдан иборатдир.

- Мустақилликнинг дастлабки йилларидан Сурхон воҳасида ҳар икки йилда Президент соврини учун Ҳаким ат-Термизий хотирасига бағишланган халқаро турнир ўтказилмоқда. Чет эллик меҳмонлар миллий ўйинларимизга қаратилаётган бу даражадаги эътиборни кўриб, ўз ҳайратларини яшира олмаяптилар. Сизнингча, кураш нима?
- Кураш - халқимиз ҳаётида минг йиллардан буён яшаб келаётган ажойиб спорт тури. Лекин унинг ҳозирги мавқеи бўлакча. Спортнинг бу тури дунёнинг кўплаб давлатларида йилдан йилга оммавийлашиб бораётгани жуда қувонарлидир. Қайси халқ бўлишидан қатъий назар, кураш деса, ҳамма бирдек тушинади. Бу ўз навбатида ўзбек халқининг маданияти ва санъати, хусусан, тилининг ҳам кенг ёйилишига сабаб бўлмоқда. Кураш - келажаги бор, халқлар ўртасидаги дўстликни мустаҳкамлайдиган спорт тури. Шунинг учун ҳам у дунё халқларини мафтун этмоқда.

Ҳиндистонлик курашчи Маниш Кумар

Қизиқарли ва муросасиз ўтаётган баҳслар жараёнида хориждан ташриф буюрган полвонларнинг ҳам фикрлари билан қизиқдик. Дастлаб ҳиндистонлик курашчи Маниш Кумарни суҳбатга тортдик:

- Ўзбекистон, мусобақага мезбонлик қилаётган Сурхондарё ҳақида фикрларингиз?
- Бу Ўзбекистонга, айнан, Термизга иккинчи марта келиб, кураш мусобақасида иштирок этишим. Халқингиз жуда меҳмондўст, самимий. Термиз шаҳри йилдан йилга ривожланиб, кўркам гўшага айланаётганига гувоҳ бўлдим.

- Бу ерда сизни биринчи бўлиб диққатингизни тортган нарса?
- Бу ерда диққатимни тортган нарса – бу маданиятингиз, бозорларингиз.

- Кураш спорти билан неча йилдан бери шуғилланмоқдасиз?
- Кураш билан 7 йилдан бери шуғулланаман. Бу мусобақага тажриба орттириш мақсадида келдим ва ўзбек курашчиларидан кўп нарса ўрганмоқдаман.

- Юртингизда бу спорт турига бўлган муносабат қай даражада?
- Бизнинг халқимиз ҳам кураш спортига жуда иштиёқманд, ўн минглаб одамлар кураш мусобақаларини томоша қилади. Ўзбек кураши жаҳонга машҳур, жумладан, Ҳиндистонда ҳам. Кураш билан шуғулланувчи инсонлар юртимда жуда кўп ва йилдан йилга ортиб бормоқда.

- Кураш спортига қизиқишингизга ким ёки нима сабабчи бўлган?
- Дастлаб мен дзюдо билан шуғилланганман, кейинроқ курашга бўлган қизиқишим ортиб, бу спорт турини танладим ва шу кунга қадар курашда яхши натижаларга эришиб келмоқдаман.

- Ҳинд аёлларининг курашга бўлган муносабати ва иштироки қандай?
- Ҳинд аёлларининг ҳам курашга бўлган қизиқиши катта. 2011 йил Сурхондарёда бўлиб ўтган Жаҳон чемпионатида аёл курашчимиз бронза медални қўлга киритган. Бу спорт турини янада оммалаштиришимиз, халқларни янада кўпроқ жалб қилишимиз лозим. Ўзбек Кураш ассоциацияси бу борада кенг кўламли ишларни амалга оширмоқда ва бунга катта эътибор қаратмоқда.

 Конго-Браззалик полвон Патана- Гаудард 

Бугун кураш спортнинг энг яхши турларидан бири сифатида дунёнинг беш қитъасини қамраб олмоқда. Навбатдаги суҳбатдошимиз Африка қитъаси Конго-Браззалик полвон Патана- Гаудард бўлди:

- Юртимиз ҳақида фикрларингиз?
- Мен, аввало, юртингизга келганимдан жуда ҳам хурсандман. Халқингизнинг яхши кутиб олганидан миннаддорман. Дарвоқе, бу Ўзбекистонга илк ташрифим бўлади.

- Кураш билан қачондан бери шуғилланиб келмоқдасиз ва бу спорт турига қандай қизиқиб қолгансиз?
- Икки йилдан бери шуғулланаман. Кўриб турибмизки, кураш йилдан йилга ривожланиб боряпти. Ва шу сабаб ҳам мен курашни танладим. Менинг фикримча, бир кун келиб кураш спорти ҳам Олимпия ўйинлари сирасига киритилади, деб ишонаман.





суббота, 18 мая 2013 г.

ТУРНИР ОЛДИДАН МАТБУОТ АНЖУМАНЛАРИ ЎТКАЗИЛДИ

Термиз шаҳридаги муҳташам “Сурхон” спорт мажмуасида Ўзбекистон Республикаси Президенти соврини учун Ал-Ҳаким ат-Термизий хотирасига бағишланган XI халқаро турнир бошланиши олдидан 17-18 май кунлари хорижий ва маҳаллий ОАВ ходимлари учун матбуот анжумани ташкил этилди.

Матбуот анжуманининг биринчи кунида Жанубий Корея Кураш федерацияси президенти Ким Эл Жун ҳамда турнир бош ҳаками Муҳаммадреза Нассири Нежад ва турнирнинг ташкилий қўмита вакиллари иштирок этишди. Анжуманда, асосан, ташкилий масалалар ва журналистларни қизиқтирган саволлар юзасидан фикр алмашилди. Ким Эл Жун жаноблари кураш ҳақида гапирар экан ўз шахсий ҳаётида курашнинг тутган ўрни беқиёс эканлигини алоҳида таъкидлаб ўтди: “Мен курашни жуда севаман, бу қизиқишим туфайли ўзбек тилини ҳам ўргандим. Аниқ айта оламан мен ҳаётимни курашсиз тасаввур эта олмайман. Шуни айтмоқчиманки, мен курашнинг янада ривожланиши учун астойдил ҳаракат қиламан”. Анжуман якунида меҳмонлар журналистларнинг бир қатор саволларига жавоб беришди.

Матбуот анжуманининг иккинчи кунида, Инчеон (Жанубий Корея) да бўлиб ўтадиган Осиё ўйинлари ташкилий қўмитаси аъзоси жаноб Чо Ҳеунг Кеун, Кураш Халқаро ассоциациясининг Франциядаги аъзоси, Франция Кураш федерацияси президенти жаноб Кабос Дуҳамел Бернард иштирок этди.

“Жанубий Кореяда ҳам миллий ўйинлар мавжуд, аммо кураш каби кенг миқёсда нишонланмайди. Юртингизда кураш мусобақаларининг байрам сифатида нишонланишидан, бевосита халқингизнинг кенг кўламли иштирокидан, очиғи, ҳайратдаман” – дейди жаноб Чо Ҳеунг Кеун берилган саволларга жавобан. Шунингдек, Инчеонда бўлиб ўтадиган Осиё ўйинларига кураш спорт тури сифатида киритилгани ва айни пайтда мазкур мусобақаларга тайёргарлик жараёни хусусида атрофлича фикр юритди: “2 июльдан 6 июльгача давом этадиган мазкур мусобақада саккиз тоифа бўйича аёллар ҳамда эркаклар ўзаро куч синашадилар ”

Жаноб Кабос Дуҳамел Бернард жорий йилда Францияда кураш бўйича ўтказиладиган IX жаҳон чемпионатига кўрилаётган ҳозирлик тўғрисида маълумот берди. Шу билан бирга, Термиз шаҳри мезбонлик қилаётган халқаро турнирга ҳамда  аёллар курашига ўз муносабатини билдириб ўтди: "Аввало, мен кураш деганда кўз олдимга Амир Темур гавдаланади. Кураш Амир Темур даврданоқ ривожланиб келган, деб ўйлайман. Бу турнирнинг аҳамияти ва нуфузи эса жуда юқоридир. Кураш, асосан, эркаклар спорти, аммо бугунги кунда Францияда аёллар ва болалар ҳам бу спорт турига катта қизиқиш билдирмоқдалар. Шу ўринда, Франция Кураш федерациясини янада кенгайтириш мақсадида кенг кўламли ишлар амалга оширилмоқда".

Якунда эса курашнинг оммабоп спорт тури сифатида дунё бўйлаб кенг қулоч ёзгани ҳақида фикр алмашилди.

Гулрухсор ХУДАЙБЕРДИЕВА

пятница, 17 мая 2013 г.

ТЕРМИЗ МУСОБАҚАГА ТАЙЁР


Термиз шаҳрида Ўзбекистон Республикаси Президенти соврини учун Ал-Ҳаким ат-Термизий хотирасига бағишланган халқаро турнирга қизғин тайёргарлик кўрилди.


Замонавий усулда жиҳозланган “Сурхон” спорт мажмуасида ўтказиладиган мазкур турнирни юксак савияда ўтказиш учун алоҳида тайёргарлик кўрилди.

Халқаро турнирни юқори даражада ўтказиш учун мажмуага иккита янги кураш гилами, иккита электрон тарозу келтирилди. Мажмуа атрофида кенг кўламдаги ободонлааштириш-кўкаламзорлаштириш ишлари амалга оширилди. Мамлакатимиз жанубидаги Сурхондарё вилояти маркази байрамона безатилиб, кўча ва хиёбонлар тартибга келтирилди, ранго-ранг гуллар ўтқазилди.



Дунёнинг 40 га яқин давлатидан энг кучли полвонлар иштирок этадиган нуфузли турнир олдидан хорижлик ва маҳаллий журналистлар учун матбуот анжумани ва бошқа тадбирилар ўтказиш белгиланган.

Меҳмонларни тантанали кутиб олиш, жойлаштириш, сифатли хизмат кўрсатиш, бўш вақтларини мазмунли ўтказиш учун ҳам тегишли чора-тадбирлар белгилаб олинди. Айни пайтда меҳмонлар тантанали кутиб олинмоқда.

Гулрухсор ХУДAЙБЕРДИЕВА

четверг, 16 мая 2013 г.

WRESTLERS OF FIVE CONTINENTS IN SURKHANDARYA

Receiving ceremony the foreign guests and sportsmen

The participants of traditional XI International Tournament on Kurash for the prize of the President of Republic of Uzbekistan dedicated to the memory of Al-Hakim at-Termiziy, came to ancient Surkhandarya. The delegation consists of more than 150 wrestlers and guests from near 40 countries on May 16.


Uzbek girls in national dresses with sweets, uzbek bread and dried fruit

At Termez Central airport the girls in national dresses received the guests with sweets, uzbek bread and dried fruit. Uzbek blowing instruments - carnai and surnai made a great impression on the foreign visitors. A two-day tournament will be started on May, 18.
In addition to this, it is planned to take the guests and wrestlers of the tournament to the pilgrimage place of Al-Hakim at-Termiziy and acquaint with The Termez Archeological museum and the sights of the city.

Gulrukhsor KHUDAYBERDIYEVA

SURXON VOHASIDA KURASH BO’YICHA XALQARO TURNIR START OLMOQDA

Surxonga safar

O’zbekiston Respublikasi Prezidenti sovrini uchun Al-Hakim at-Termiziy xotirasiga bag’ishlangan xalqaro turnirda ishtirok etish uchun 40 ga yaqin mamlakatdan 150 dan ortiq mehmonlar hamda matbuot xodimlaridan tashkil topgan delegatsiya Surxondaryo viloyati, Termiz shahriga yetib keldi.

Kutib olish marosimi

  Mehmonni mana bunaqa kutib oladilar :)

Ob-havoga hamohang tarzda voha ahlining ham istarasi issiq; mehmondo’stligi yaqqol ko’zga tashlandi: vohaning barno qizlari qo’llarida pista-bodom, shirmoy nonlar, yuzlarida tabassum ila karnay-surnay navolari ostida delegatsiyani kutib oldilar. 4 kun davom etadigan ushbu turnirga 18-may kuni, start beriladi. Barcha polvonlarga omad tilaymiz :)
Gulruxsor XUDAYBERDIYEVA

воскресенье, 12 мая 2013 г.

Samsung Galaxy S4 smartfoni: taqdimotdan shou-konsertgacha


Kuni kecha “Turkiston” san’at saroyining yozgi maydonida bo’lib o’tgan Samsung Galaxy S4 smartfonining O‘zbekistondagi ilk taqdimot marosimi bo‘lib o‘tdi. Tadbir soat 16:00 da boshlanib kech soat 23:00 gacha davom etdi.

“Muloqotchilar” va “Daryochilar” taqdimot oldidan

Taqdimotga kelganlar uchun qulay imkoniyatlar yaratildi

Sahnadagi ekran orqali berilayotgan ma’lumotlardan tashqari, kirish joyida ham sinov maydonchalari tashkil etilgan bo‘lib, qiziquvchilar Samsung Galaxy S4 smartfonining funksiyalari bilan tanishib, ko‘zdan kechirib, bevosita ishlatib ko‘rdilar.
Bu sinov maydonchalarida Samsung Galaxy S4 smartfonida olingan kaminaning 
surati. Suratda 2 ta kadr mavjud: asosiy (orqa) kamerada olingan fonda men, meni
suratga olgan kursdoshim Jamshid esa old kamerada olingan kichik hajmli fonda.


Esdalikka suratga tushish uchun Samsung Galaxy belgilari tasvirlangan 
maxsus fonlar tashkil etilgan bo‘lib, barcha xizmatlar bepul :)


Kompaniya xodimlaridan bir nechtasi telefon borasida tomoshabinlarni qiziqtirgan barcha savollarga javob berdilar:

Samsung Galaxy S4 smartfoni 8 ta protsessorga ega bo‘lib, bundan oldingi modelda ularning soni 4 ta edi;

Og‘irligi 130 gramm, qalinligi 8 millimetrdan kamroq bo‘lib, 2 gigabayt operativ xotiraga ega;

13 megapiksilli kameraga ega;

Har bir surat hajman o‘rtacha 3 megabayt va 4128 x 3096 piksel o‘lchamida;

Surat oluvchining ham suratda aks etishi: telefon ikkita kamerali bo‘lib, asosiy kamera orqa fonni, ya’ni surat obyektini, kichik hajmli old kamera esa surat olayotgan kishini “nishon”ga oladi;

Ushbu telefonda tushirilgan suratlar ustiga 9 soniyalik ovoz ham yozsa bo‘ladi;

4 soniyada uzluksiz 100 ta kadr olib, ulardan bitta jonli kadr tayyorlay olish imkoniyati;

Suratga tushayotganda oldingizda yoki orqa fonda siz bilan beixtiyor birga tushib qolgan shaxs yoki buyumni o‘chirib tashlash imkoniyati;

Tez harakatlanayotganda hamda kechki paytda ham sifatli surat olish imkoniyati;

Bir nechta suratlar olib, ichidan eng yaxshisini  (masalan, kulib turgan suratingizni) tanlab saqlaydi;

Yana bir ahamiyatli jihati – bu “Smart Pause”: ushbu telefonda video ko‘rayotib, diqqatingiz chalg‘ib, ko‘zingizni undan uzgan zahotingiz, video avtomatik tarzda to‘xtaydi. Qarashingiz bilan yana to‘xtagan joyidan davom etib ketaveradi. Bir so‘z bilan aytganda, ekran nigohni his etadi;

Tasavvur qiling, qo‘lingiz biror ish bilan band. Surat ko‘rishni xohlaysiz. Buning uchun telefonga barmog‘ingizni tekkizishingizning hojati yo‘q, chunki Samsung Galaxy S4 smartfoni qo‘lingizning muallaq harakatini his etadi va unga bo‘ysunadi;

Samsung Galaxy S4 smartfoni O‘zbekiston bozorlari yuzini ko‘rgan bo‘lib, narxi taxminan 1 900 000 – 2 300 000 so‘m oralig‘ida;

Batareya quvvatini kam “yeyishi” hamda kamerasidagi yangi imkoniyatlari bilan Samsung Galaxy S4 eng zo‘r telefondir.


“Galaxy Studio”da fotoramka

Samsung kompaniyasining Galaxy Note smartfon va planshetlarida surat chizish imkoniyati ham mavjud ekanligini ko‘pchilik bilsa kerak. Tashrif buyurganlarni qiziqtirish maqsadida taqdimotga jalb etilgan bir nechta rassomlar sinov maydonchalarida tomoshabinlar portretini chizish orqali bu funksiyani ham namoyish etdilar. Tayyor bo‘lgan suratlar fotoramkasi bilan birga kompaniya tomonidan o‘z egalariga sovg‘a qilindi.

Surat chizish jarayonini yirik ekranda ham ko‘rish mumkin

Samsung Galaxy Note planshetida chizilgan
kaminaning surati garchi o‘xshamagan bo‘lsa ham  :)


Taqdimotning badiiy qismi

Qariyb 7 soat davom etgan taqdimot marosimi shou-konsertiga ulanib ketdi: “A’lo” guruhining qo‘shiqlaridan so‘ng “Quvnoqlar va zukkolar”ning chiqishlari barchaga tabassum ulashgan bo‘lsa, Shahzoda, Tohir Sodiqov hamda maxsus mehmonlar – Potap va Nastyaning ijrolari kechaning cho‘qqisi bo‘ldi.

пятница, 3 мая 2013 г.

“АВТОБУСЛАР ПОЙГАСИ”





Хар тонг ишга, ўқишга отланар эканмиз, йўлларимизда “Тоштрансхизмат”нинг хизматлари поёндоз бўлиб туради. Азим Тошкентга хос бўлган яшил тусли автобуслар бутун пойтахтни қучиб олгани қувонарли ҳол. Табиат рангига ҳамоҳанг бўлган йўловчи ташиш транспортлари нафақат узоғимизни яқин қилади, балки шаҳримиз кўркига кўрк қўшиб туради.



Яқинда бекатда турна қатор саф тортиб турган транспортлар орасидан ўзимга тегишли автобусга чиқиб олдим. Лекин автобуснинг қўзғалиши мудраётган кўзларни мошдек очиб юборди, ҳушёр тортишга ундади. Тутқичдан маҳкам ушлаб олган бўлишимга қарамай, автобусга қўшилиб ўнгдан чапга, чапдан ўнгга, олдингга, орқага, юқоригасакраб эшилиб-букилиб келяпман. Чипта сотувчи йигитнинг қорасини кўриб, ўйлов босди: қандай қилиб ҳамёнимни олсам экан... Шамолдай елаётган автобус тутқичини бир сонияга ҳам қўйиб юбориш жонингизни гаровга қўйишдек гап. Лекин чиптачи йигит тепангда, худди  шу-у-унча одам ичидан қочиб қолишинг мумкиндек ўқрайиб турса, наилож... Бир амаллаб ҳамёнимдан пул олиб узатишимни биламан, автобус тормоз бериб мен ёнимдагига, ёнимдаги ёнидагисига... урилиб, узрбозлик бошланиб кетди.
- Ҳой болам, ўтин ташиётганинг йўқ-ку!
- Секинроқ ҳайдангов – ўриндиқда ўтирган ёши катталарнинг норозилиги бошланиб кетди.
- Қанақа секин ҳайдай, бу ёқдан қистаб телефон қилишяпти-ку тезроқ ҳайда деб? – шундай деб ҳайдовчи ўз билганидан қолмади.

Шунга амин бўлдимки, йўловчи ташиш транспортлари нафақат узоқни яқин қилиб, пойтахт кўркига кўрк қўшиб турар экан, балки овқат ҳазм қилиш фаолиятига ҳам катта ҳисса қўшар экан.

Ҳазил ўз йўлига, аммо бизга маълумки, амалдаги қонунчилигимизда ҳаракатдаги транспорт воситаси ҳайдовчиси мобил телефондан фойдаланиши тақиқлаб қўйилган. Шунга қарамай, баъзи автобус ҳайдовчилари мобил алоқа воситасидан “наушник” орқали фойдаланишади ва ҳаракат вақтида ҳам бемалол бир-бирига қўнғироқ қилиб, “тезроқ юр”, “секин ҳайда”, “сендан олдин ким кетяпти”, “мен ҳозир фалон жойдаман” деб гап талашиб кетаётганига гувоҳ бўламиз. Уларнинг бу ҳаракатини кузатиб, “ҳайдовчими ёки алоқа операторими?”, дея ўйлаб қоласан, киши. Бу орқали ўзлари билан бир қаторда шунча одамнинг  жонини  ҳам хатарга қўяётганини ўйлашармикин?

Шу аснода ўриндиқда ўтирган ҳомиладор аёлга кўзим тушиб қолди. Бечора ўзини қўлга олиб ўтиришга шунчалик уринардики, юзи докадек оқариб кетганди. Бу ҳолатга “юксиз” йўловчилар зўрға чидаяпти-ку. Бирдан йўловчиларни заррача ўйламай, менсимай автобусни “мингга” қўйиб бораётган “фаросатли” ҳайдовчидан жаҳлим чиқиб кетди. Ахир, у ўтин ташиётгани йўқ, одам ташияпти-ку.

Наҳотки,жамоат транспортларининг жадвал асосидаги ҳаракати шундай нохуш вазиятларни юзага келтирса?! Ахир, инсон ҳаёти ҳамма нарсадан устун эмасми?!

Дарслар тугагач, яна автобусга чиқдим. Аммо энди буниси эрталабки автобусдан ҳар бекатда беш дақиқа туриб қолиши, юрганда ҳам тошбақа юриш қилиши билан тубдан фарқ қилди. Кейин билсак, ҳайдовчининг яна бир ҳамкасби: “Секинроқ юр, сендан олдин кетган автобусга ҳеч қанча вақт бўлмади”, деб телефон қилган экан.

Гулрухсор  Худайбердиева

пятница, 22 марта 2013 г.

ESLASH TAQIQLANGAN FARAHBAXSH YILLAR


Odatda, men umr yo’li davomida ortiga deyarli nazar tashlamaydigan, yaxshimi yoki yomon – qanday bo’lmasin o’tgan kunlarini hatto eslamaydigan, faqat ertasini o’ylab bugunida yashaydigan insonlar toifasidanman. Ammo bugun, ayni damda  bolaligimni xotirlab, bundan 10 yil burunga – 10-11 yoshlarimga qaytgim keldi.

Bolaligim Qarshi tumanining ikki qishlog’ida – “Dasht” (“Cho’li ota” ham deyishadi. Ona tomondan) va “Shilvi” (Shayx Shibliy nomiga qo’yilgan. Ota tomondan) da o’tgan. Ayniqsa, yozgi ta’tilga chiqdik deguncha, bo’zchining mokisidek u qishloqdan bunisiga, bunisidan Qarshi shahriga ko’chib yurardik tugun-tersaklarimiz bilan. Shu sabab dadam tomonidan “ko’chmanchilar” degan “orden”ga sazovor bo’lishga ham ulgurganmiz.


“Dasht” xotiralarimdan parcha:


May oylari momomlarning hovlisiga kiraverishda askarlardek saf tortgan tub-tub qo’riqchi tut daraxtlari ta’sirida havodan tut hidi anqirdi. Ming-minglarcha gavharlar yerni o’pib, shirasiga cho’miltirib yotar, yer ham yana yuzlab oshiqlariga bag’rini ochib, ko’ksini kerib turardi. Biz kelgan zahotimiz Himolayni zabt etgan alpinistlardek, tut daraxtlarini zabt etishga kirishib ketardik. “Ko’rmaganning ko’rgani qursin” maqoli bizning o’sha holatimizga juda-juda yarashardi. Rosti-da, shaharda, boz ustiga ko’p qavatli uyda – Xudoga yaqin joyda tursak, tut ko’ribmizmi?! :)))

Tut ziyoratidan so’nggina, momo-bobo ziyoratiga o’tardik.

Hovli keng-kushot bo’lib, so’l qismidan joy olgan issiqxona limon yetishtirib berishdan, biz esa limonlarni terib sotishdan charchamas edik. Bobomning qon bosimi yuqoriligi sabab, ko’p limon iste’mol qilardilar.


Bog’ning to’g’risida (issiqxonaning orqa qismida) ulkan qozon bo’lib, yoz oylari ichiga suv solsak, birpasda isirdi. O’sha qozon bizning basseynimiz edi. Shu bilan birga, bizga qo’yilgan tuzoq ham aynan o’sha qozon bo’lgan:

Bir safar singlim ikkimiz xolamning (darvoqe, bitta xolamiz bor) jahlini shunaqangi chiqarganmizki… Azbaroyi bog’ni 5-6 aylantirib quvganlar :))) Oxiri o’sha qozonning ichiga tushib ketib, qo’lga tushib qolganmiz. Rosa kaltak yegandik o’shanda :)))

Yoz oylari oxiri, kuz oylari uzumxo’rlikka kelardik. Hovlidagi ishkomlarda nozlanib turgan “husayni”, “kishmish” lardan bahramand bo’laman deb, arilar bizdan bahramand bo’lib, yuz-ko’zlarimiz haftalab shishib yurardi :))) Bu ham yetmagandek, tog’amlarning “Semiribsanmi, Gulposh?”, “Bo’g’irsoq qiz bo’lsang, qanday yarasharkan-a?!” qabilidagi  kinoyali kulgulari ostiga qolib ketardim :)))


Erta bahorda esa hovlining tashidagi ikki tomorqani singlim ikkimiz bo’lib olib, “Kimning tomorqasida ko’p qoqigul o’sadi?” degan o’zimiz o’ylab topgan o’yinni o’ynardik. Qoqigullar ko’paygani sari, bahri dilimiz ochilardi. Bir safar bizga tegishli “zona”dagi qoqigullarni tergani uchun o’zimizdan ikkita keladigan sho’ring qurg’ur bir yo’lovchi qizni tutib olib, boplab do’pposlaganmiz :)))


O’sha eski, pastak, ammo fayzli, farishtali hovli beg’ubor bolaligimga guvoh edi. Keyinchalik hovlini butunlay buzib, o’rniga mahluqdek bahaybat imoratlar solishdi. Askarlardek tizilgan tut daraxtlaridan esa to’nkalar qoldi xolos. Endi bobom ham, momom ham yo’q. Bobom vafotidan ko’p o’tmay, issiqxona ham nobud bo’ldi. Undan to’rt nuragan devor-u, to’rtta temir-tersak hamda qaqrab yotgan yerdan bo’lak hech vaqo qolmagan ((((((:


BU FARAHBAXSH YILLARNI ESLASHNI O’Z-O’ZIMGA TAQIQLAGANMAN. ESLAB XUMORI TUTGANDA, AXIR, QAYDAN TOPAMAN?!


Shu xotiralarni yozishim barobarida, daftarga tomchilayotgan achchiq yomg’ir xuddi bolaligimni buzib tashlashganidek, satrlarni ham o’qib bo’lmas darajada yuvib ketyapti.


среда, 20 марта 2013 г.

“YAKUNIYSHUNOSLIK” FANI


Yurtimiz Oliy ta’lim maskanlari bo’ylab yilida ikki marotaba bir hafta mobaynida “Yakuniyshunoslik” fani o’tiladi. “Ko’chirmashunoslik” fani ham bu fanning tarkibiy qismi hisoblanadi. Ertasini o’ylaydigan chaqqon talabalar tomonidan bir hafta ilgari kutubxonalar talangan, toshbaqa talabalar (menga o’xshagan) esa kitobsiz qolgan keskin bir vaziyat yuzaga keladi.

Darvoqe, “Yakuniyshunoslik” fani haqida ikki og’iz: bu fan o’zida boshqa barcha fanlarni qamrab olgan bo’lib, maqsadi va vazifasi BITTA: 

TALABALARDA YOZUVCHILIKNI SHAKLLANTIRISH.
Shiori: YOZAMIZ, YOZAMIZ VA YANA-YANA YOZAMIZ.

O’zbekiston Milliy universitetining Jurnalistika fakultetida ham ushbu fan har yili muvaffaqiyatli yakunlanadi. “Yozxo-yoz” da bo’lajak, yosh jurnalistlar o’zlarining o’tkir va o’tmas qalamlarini namoyish etadilar. Umuman “notanish” savollarga yoki ba’zi puxta domlalar tomonidan tuzilgan “olib-qochish” ish bermaydigan konkret javob talab qiladigan savollarga yo’liqqanda ham talabalar dovdirab qolishmaydi, BALKI tizzalariga qo’ngan “najot farishtasi” dan ilhom olib yozadilar.


TIRIGIDA QADRIGA YETAYLIK


Men muhabbatni insonga qiyoslagan bo'lardim, ya'ni u inson ichidagi inson... Uning ham joni bor, u ham xuddi insonlar kabi (qalblarda) tug'iladi, yashaydi, noto'g'ri munosabat tufayli o'ladi yoki asrab avaylashimiz natijasida bizga berilgan umrchalik umr ko'radi.


O'lgandan so'ng marmardan qabrtosh o'rnatib, faryod urib, ko'klarga ko'tarib, she'rlar bitgandan ko'ra, muhabbatimizni tirigida qadriga yetaylik…

5-dekabr, 2012

QISHNING QIZIMAN


Derazamni ochib hukmron qish tabiatini kuzatar ekanman, yuzimni savalayotgan qor parchalari armonga aylangan bir paytlardagi orzularimni yodimga solib yubordi. Yodimga solsa ham, vujudim qahraton qish qahridan ham battar sovuq. Nigohlar sovuq. Munosabat sovuq. 
Go'yo qishning qiziman...
25-dekabr, 2012

HAYOTNING MOHIYATI MENING NAZDIMDA


Istaymizmi, yo'qmi, mag'lubiyatlar yuz beradi. Orzu-umidlarimiz ro'yobi uchun endigina kurashga otlangan chog'imizda tajribasizligimiz tufayli juda ko'p xatolarga yo'l qo'yamiz. Menimcha, hayotning mohiyati ham aslida shu - YETTI MARTA YIQILIB, SAKKIZ MARTA OYOQQA TURIB KETA OLISH.

Yoki polyaklar ta'biri bilan aytganda, HAYOT SENGA LIMON BERSA, UNDAN LIMONAD TAYYORLAY BILISH. 
28-dekabr, 2012

понедельник, 18 марта 2013 г.

SABRNING TAGI SARIQ CHAQA


Sabr ham har xil bo’ladi: o’rinli va o’rinsiz. Uni ham har xil tushunadilar: ba’zilar sabr-toqatga ijobiy sifat deb qarasa, boshqa birovlar esa andishaning otini qo’rqoq qo’yganidek, sabr-bardoshli insonga “o’z qadr-qimmatini bilmas” degan tamg’ani bosadi, qo’yadi.

Oilani mustahkamlash, oila rishtalarini saqlab qolish yo’lidagi va shu kabi harakatlarga sabr bilan yondashish – bu ulug’ sifat, albatta. Ammo allanimalarga erishish yo’lida yoki kimningdir xurmacha qiliqlariga nisbatan tengsiz sabr ko’rsatish – bu insonni o’sha qadrlagan narsasi, qadrlagan kishisi oldida qadrsizlantiradi va ular nazdida aqldan ozgan qilib ko’rsatadi. Boringki, bardosh kuchi bilan intilganimizga erishdik deylik. Endi aql tarozining bir pallasiga erishgan orzumizni, narigi pallasiga esa birinchi palladagiga erishguncha chekkan istiroblarimiz, uzilgan millionlab asab tolalarimiz, ba’zan uyqusiz tunlarimiz, litrlab to’kilgan ko’z yoshlarimiz, yuzimizni “bezay” boshlagan mitti ajinlarimiz, siqilishdan orttirgan bosh og’rig’imiz, yo’qolgan kulgularimiz-u, sog’lig’imiz – barchasini qo’yaylik.
Endi mingta shunday ushalgan orzumizni qo’ygan taqdirimizda ham, qarshi pallani yengillata oladimi?!

Bir nimaga erishaman deb, ba’zan umrimiz davomida erishgan, mavjud noyob narsalardan ayrilib qolishimiz hech gap emas.

Xatto sabrning ham o’z VAQTI, O’RNI hamda ME’YORI bor. Bularga amal qilinmas ekan, SABRNING TAGI SARIQ CHAQA.

суббота, 16 марта 2013 г.

QOTILLIGIM


O'ylab qarasam, shavqatsizlik bobida Dantedan qolishmas ekanman. Qanchadan qancha xiyonatkor do'stlarni, o'z hayotim uchun xavfli, zararli deb bilgan odamlarni tirigidayoq o'ldirib yubordim. Dodlayotgan qalbim ovozini o'chirib, xatto eng aziz insonimni ham ayab o'tirmadim. Qanchadan qancha gunohkor-u begunoh, aybdor-u aybsiz insonlarni turli tamg'alar bilan hayotimdan, hayollarimdan yulqib olib, qalbim qabristoniga tiriklayin ko'mib yubordim.

Bu - mening muloyimlik ortiga berkingan SHAVQATSIZLIGIM. Beozorlik to'nini kiyib olgan QOTILLIGIM.
18-yanvar, 2013

YO'QOTISH SHARTMI?!


Azizlar, sizga erkalik yo injiqlik qilayotgan insonni koyib, ko'ksidan itarishdan avval bir o'ylab ko'rganmisiz: Siz uning uchun eng yaqin inson ekansizki, erkalik-u injiqliklarini sizga ko'rsata olyapti. Qani aytingchi, kim begonaga, yoki yuragiga begona bo'lgan tanishiga injiqlik, erkalik qila oladi???

Hayotda shunday insonlar bo'ladiki, bir umr hech kimga ichki olamini, asl go'zallik, jozibasini namoyon etmaydi. Faqat sizga ochiladi bu "simsim". Atrofdagi minglab insonlar bir umr ko'ra olmaydigan olamni faqat sizgina ko'ra olasiz. Bu olamni ochishga, unda yashiringan xazinaga erishishga uringanlar orasida siz ustun keldingiz. Sizga nasib etdi bu baxt.

Nega endi baxtingizdan tonasiz?
Yo to'qlikka sho'xlikmi?
Nimanidir qiymatini bilish uchun uni, albatta, yo'qotishingiz shartmi...?!

29-yanvar, 2013

G'URUR HISSI


Mehr-muhabbatdan ko'ra kuchliroq, ustunroq bir his borki, aynan shu his bizni bir-birimizdan ayiradi, sovimagan munosabatlar orasiga shunchalik baland va qalin devor o'rnatadiki, undan qarshi tomonga na bo'ylab bo'ladi va na ortidagi haroratni his etib. Ba'zi insonlar umrbod shu devor ortida qolib ketadi.

Yillar o'tib qor-yomg'irlar ta'sirida chirigan devorni ko'rib, birdan g'ayratimiz jo'shib qoladi. O'zimizni qahramonlarcha his etib, uni kurab yiqitganimizda esa qarshimizda butkul begona (balki begonaga aylangan) dunyo, "orzu" daraxti ko'karmas yovvoyi tabiat namoyon bo'ladi. Devor ortida hali ham yoz hukmronligiga, quyosh taftiga ishonib yupin kiyingan tanamiz esa qishning sovuq haroratidan junjika boshlaydi. Hali voqeani hazm qilishga ulgurmasimizdanoq, kuchli bo'ron kelgan joyimiyga - devor ortiga uchirib yuboradi...

HA, BA'ZAN BIZ, INSONLAR "TURG'UNLIK" NISBIY EKANINI, "O'ZGARISH" QONUNIYATI HAQ EKANINI TAN OLISHNI XOHLAMAYMIZ.

Tuyg'ulardan ko'ra kuchliroq, insonlarni bir-biridan ayiradigan, mehr-muhabbat orasiga o'tib bo'lmas devor o'rnatadigan his - bu G'URUR HISSI...

BA'ZIDA G'URURNI YENGISHIMIZ, AQALLI JILOVLASHIMIZ KERAK EKAN. AKS HOLDA, UNING YEMISHIGA AYLANIB QOLAMIZ...
8-fevral, 2013

FAQAT SIZ UCHUN...


Men hozir yozmoqchi bo'lgan gaplarimni nasixat deb o'ylamang. Bu meni hayot haqidagi tushunchalarim xolos. Va ularni o'rtoqlshishni lozim topdim:

Hayot xursandchilik, xafagarchilik, ko'z yoshlar-u kulgilar kabi tuyg'ularga to'la. Har qanday vaziyatda ham KUCHLI SHAXS BO'LING...

Hayot - insonga berilgan buyuk ne'mat, buyuk imkoniyat! Bu ne'matning sizga ato etilgan ulushini shunday yashangki, bir kun ortingizga qaraganizda FAQAT QUVONING...

DOIM SO'G'-SALOMAT BO'LING! Chunki tan-joningiz sog' bo'lsagina, hayot ne'matlari tatiydi. Sog'liq - bu katta boylik, cheksiz imkoniyat. Uni asrang...

Hayot to'siqlari unga urilib, yiqilib qolish uchun emas, balki ularni yengib o'tish uchun beriladi. HECH QACHON EGILIB QOLMANG! Egilsangiz ham yiqilganni turg'izish uchun egiling...

Har qanday mashaqqatlarni, qiyinchiliklarni imkoniyatga aylantirishga harakat qiling. Polyaklarda bir maqol bor:
HAYOT SENGA LIMON BERSA,
UNDAN LIMONAD TAYYORLA.

Hayotda FAQAT OLDINGA YURING! Ortizga burilib qarang, ammo ortga bir qadam ham tashlamang. Chunki unda endi baxt yo'q...

HECH QACHON "ZERIKDIM", "ZERIKYAPMAN" DEGAN SO'ZLARNI ISHLARMANG. “Hayot” so'zini anglamaganlar, vaqtini to'g'ri taqsimlay olmaydiganlarga xos bu so'zlar...

Oldingizga biror maqsad qo'ydingizmi, bu maqsad yo'lida qarshingizdan tog' chiqsa ham, CHEKINMANG, QAT'IYATLI BO'LING! Qiyinchiliklarni aylanib o'tmang, ularni yengib o'ting...

Hech qachon "Men buni qila olmayman" demang. BU YOLG'ON... Inson ruhiyati juda-juda kuchli va u hamma narsaga qodir. "MEN BUNI QANDAY QILA OLISHIM MUMKIN" DEB O'YLANG...

Nima ishga qo'l urmang, sizni kuzatib turgan ILOH BORLIGINI HIS ETIB YASHANG. SIZ YOLG'IZ EMASSIZ...

DOIMO HARAKATDA, IZLANISHDA BO'LING! To'xtab qolgan kuningizdan boshlab orqaga qaytish boshlanadi. ASLO TO'XTAB QOLMANG...

Hech qachon o'ziz uchun yashamang. BU - xudbinlik, ma'suliyatdan qochish, qo'rqoqlik... Sizni sevgan, sizga ishongan, suyangan insonlar bor. Biror ishga qo'l urayotganingizda, o'sha insonlarni ko'z oldingizga keltiring...

HECH QACHON KO'NGILLARGA OZOR BERMANG! Ko'ngilni vayron qilish – Ka’batullohni vayron qilgan kabi. Xatto Olloh kechirmaydi to o'sha bandasi kechirmaguncha. Bundan saqlaning...

VA
DOIMO KULIB YURING! (-_-) Har qanday vaziyatdan kulib turib chiqib keting. Kulib yenging odamlarni va qiyinchiliklarni...
15-sentabr, 2012